Вучиќ објави видео од сослушувањето на напаѓачот во Чациленд

Српскиот претседател Александар Вучиќ изјави дека „омразата поттикната од политичарите и медиумите довела до терористички чин во Чациленд“, импровизирана населба во белградскиот парк Пионирски каде што денеска едно лице беше рането во вооружен напад, а беше подметнат и пожар, објави Nova.rs.

Вучиќ, кој го окарактеризира инцидентот како „терористички чин“ уште пред прес-конференцијата, го започна своето обраќање откривајќи ги личните податоци на уапсениот напаѓач и детали за оружјето што го користел.

Тој наведе дека осомничениот со себе донел и канта бензин со намера да запали пожар. Потоа побара да се прикаже на јавноста снимката од ранувањето, апсењето и сослушувањето на осомничениот.

„За мене, политичкиот мотив е недвосмислен. Сакаме г-дин Богдановиќ да има успешна операција и закрепнување“, рече Вучиќ. Во исто време, тој ги повика своите поддржувачи да се воздржат од какви било собири, нагласувајќи дека „одмаздата никому не донела никаква корист“.

Во врска со инцидентот пред српскиот парламент во центарот на Белград, Студентите во блокада индиректно на својот официјален профил изјавија дека немаат никаква врска со тоа.

„Нашиот пат никогаш не бил пат на насилство“, напишаа студентите на мрежата X, додавајќи симбол на срце и кратко видео на кое се гледа огромна студентска поворка што минува низ Србија.