Вчера се одржаа локални избори во српските градови Заечар и Косјериќ. Српската напредна партија (СНС) прогласи победа во двата града, но истото го стори и опозицијата. Тензиите продолжуваат и по изборите.
Српскиот претседател денеска се огласи на Instagram.
„Ги поканувам сите оние кои размислуваат поинаку да почнат да разговараат на сите нивоа, да се договорат“, рече Вучиќ од терасата на зградата на српското Претседателство. Седеше на маса на која имаше две чинии, едната со јагоди, а другата со цреши.
„По многу месеци терор на улиците, бесправно однесување, потиснување на правата и слободите на сите, изборите во Заечар и Косјериќ завршија“, нагласи Вучиќ и ги повика граѓаните, без оглед на тоа која политичка опција ја поддржуваат, да се фокусираат на Србија и што треба да се направи за да се подобри животот.
„Сите направивме грешки по вчерашните резултати“, рече Вучиќ, нагласувајќи дека се осврнува на себе, но и на другите.
„Сите зборувавме за себе и за резултатите, успесите и неуспесите, а заборавивме да зборуваме за граѓаните, за обичните луѓе за кои се занимаваме со политика и се бориме. Овие прекрасни цреши и јагоди се од Србија и нека бидат симбол на нов почеток, разговор, соработка и иднина на Србија“, заклучи Вучиќ.
