Европската комисија денеска соопшти дека следната година ќе објави препорака до земјите-членки за забрана на конверзиони терапии за ЛГБТ+ лицата, кои се базираат на претпоставката дека е можно да се промени нечија сексуална ориентација.
Граѓанската иницијатива „Забрана за конверзиони практики во Европската Унија“, која минатата година собра повеќе од 1,1 милион потписи во 11 земји-членки, побара од ЕК да предложи обврзувачка законска забрана за овие практики.
Како одговор, извршната власт на ЕУ потврди дека нема да предложи забрана бидејќи нема законско овластување за тоа, туку наместо тоа ќе им препорача на земјите-членки да го сторат тоа.
„Секој член на ЛГБТИК+ заедницата треба да може да биде тоа што е, да го живее својот живот гордо, ослободен од насилство, дискриминација и страв. ЕК ќе усвои препорака во 2027 година со која ќе се обврзе да ги поддржи земјите во нивните напори да ги забранат овие штетни практики“, соопшти ЕК.
Конверзионите терапии ја изедначуваат хомосексуалноста со болест и се базираат на премисата дека е можно да се промени нечија сексуална ориентација или родов идентитет.
Тие можат да бидат во форма на работилници, сесии на егзорцизам или дури и електрошок терапија.
„Нема што да се лечи кај ЛГБТИК+ луѓето. Она што им е потребно е слобода, заштита и безбедност“, рече комесарката за еднаквост Хаџа Лахбиб.
