Германската армија (Бундесвер) треба да се модернизира, се договорија СПД и ЦДУ/ЦСУ во коалицискиот договор. Но, парите можат да решат само дел од проблемот. Најголем предизвик останува недостигот на кадар. Затоа, новата влада под водство на Фридрих Мерц планира да воведе нова форма на воена служба.
„Бундесверот мора да стане поатрактивен“, изјави претседателот на СПД Ларс Клингбејл за Berliner Morgenpost. Тој смета дека преку доброволно служење може да се привлечат доволно луѓе.
„Зошто не овозможиме повторно да се полага возачки испит во војска?“, предложи тој. Бундесверот, смета тој, треба да стане атрактивен работодавач за да се зголеми одбранбената способност на Германија.
Проблемот со недостиг на кадар е сериозен. Комесарката на Бундестагот за Бундесверот Ева Хогл предупреди во извештајот за 2024 година дека опремата, персоналот и инфраструктурата мора итно да се подобрат. Целта е до 2031 година бројот на војници да се зголеми на 203.000. На крајот на 2024 година имало само 181.174, а просечната возраст на војниците од 32,4 години во 2019 година се зголемила на 34 години.
Иднината може дополнително да ја влоши ситуацијата, освен ако стратегијата за волонтерски услуги не вроди со плод. Сегашниот (и најверојатно иден) министер за одбрана, Борис Писториус (СПД), се залага за нов модел заснован на доброволност. Младите на воена возраст ќе бидат поканети да пополнат прашалник, се бараат мажи, жени доброволно. Целта е младите за прв пат посериозно да се соочат со Бундесверот.
За разлика од СПД, многумина во коалицијата ЦДУ/ЦСУ сакаат повторно да го воведат задолжителниот воен рок. Сепак, аналитичарите изразуваат сомнеж за изводливоста на таков план. Според Кристијан Рихтер од Институтот за одбранбени истражувања на Бундесверот (ГИДС), недостига инфраструктура за повторно воведување на задолжителна служба, а ќе бидат потребни дополнителни касарни, центри за регрутирање и тестирање.
Слично размислува и Северин Плејер од Универзитетот Хелмут-Шмит во Хамбург.
„Немаме ни основна идеја за тоа каков модел сакаме. Поранешниот систем веќе беше разнишан, а сегашните предизвици бараат сосема нов пристап“, рече тој.
Бидејќи СПД најверојатно ќе го задржи Министерството за одбрана, позицијата на Борис Писториус за доброволниот модел е пренесена во новиот коалициски договор. Сепак, и покрај воената средина, СПД е јасна, нема да има испраќање германски војници во Украина. „Не можам да замислам дека ќе испратиме германски војници во таа војна“, рече Ларс Клингбејл.
