Грција, Франција и Германија испраќаат воена помош на Кипар откако британската воздухопловна база на островот беше нападната од ирански беспилотни летала во понеделник. Франција ќе испрати фрегата заедно со копнени системи за противдронови и противракетна одбрана, додека Германија, исто така, потврди дека испратила воен брод. Грција веќе испратила борбени авиони и нејзините фрегати се на пат, објави Euronews.
Кипарските власти потврдија во вторник дека Франција испраќа воен брод за зајакнување на воздушната одбрана на земјата. Германија, исто така, позитивно одговори на барањето на Кипар, потврдија тројца неименувани претставници, додавајќи дека опремата треба да пристигне што е можно поскоро.
Грција веќе испратила четири борбени авиони F-16, а две од нејзините фрегати пловат кон островот. Овие потези се дел од активирањето на заедничката одбранбена доктрина на Грција и Кипар, стратешки план меѓу Атина и Никозија во случај на закана.
Кипарскиот претседател Никос Христодулидес потврди дека бил во контакт со германскиот канцелар Фридрих Мерц и италијанската премиерка Џорџа Мелони. Тој ја даде изјавата за време на состанокот со грчкиот министер за одбрана Никос Дендиас и началникот на грчкиот Генералштаб за одбрана, генерал Димитрис Хупис.
„Ова во пракса покажува дека Грција го води патот по кој треба да оди Европската Унија во вакви случаи“, рече Христодулидес. Беспилотно летало ја погоди британската база на РАФ во Акротири кратко по полноќ во понеделник, предизвикувајќи мала материјална штета на хангарот.
Британски борбени авиони пресретнаа уште две беспилотни летала истиот ден, според официјални лица. Кипарската влада објави дека беспилотните летала биле лансирани од Либан и дека милитантите на Хезболах веројатно стојат зад нападот.
Во меѓувреме, британскиот премиер Кир Стармер изјави во понеделникот дека Вашингтон нема да ги користи британските воени бази на Кипар за своите операции во Иран, и покрај критиките од американскиот претседател Доналд Трамп.
Стармер во неделата објави дека се согласил со барањето на САД за користење на британските бази „за специфични и ограничени одбранбени цели“, но во понеделник тој појасни во парламентот дека ова не се однесува на Кипар.
„Базите на Кипар не се користат и нема да бидат користени од САД... бидејќи не се соодветни за тоа“, рече тој.
