Иран не побара прекин на огнот, изјави министерот за надворешни работи Абас Аракчи, и сака секој крај на војната со Израел и САД да биде конечен, објави полуофицијалната новинска агенција Students News Network. Иранскиот министер за надворешни работи јасно стави до знаење дека главниот услов на Иран за мир е тој да биде конечно решение, без никакви понатамошни последици.
Аракчи додаде дека Ормутскиот Теснец е затворен „само за непријатели и оние кои ја поддржуваат нивната агресија“.
Портпаролот на Министерството за надворешни работи додаде дека бродовите од земјите кои не се вклучени во војната можат да поминат низ теснецот во координација и со одобрение на иранските сили.
Околу една петтина од глобалната нафта и течен природен гас обично поминува низ Ормутскиот Теснец, кој е затворен со недели откако започна војната меѓу САД и Израел против Иран на 28 февруари.
Претседателот на САД, Доналд Трамп, во саботата ги повика Кина, Франција, Јапонија, Јужна Кореја, Велика Британија и другите земји погодени од ограничувањата за испорака на нафта низ Ормускиот теснец да се здружат во напорите за повторно отворање на водниот пат.
Франција се стреми да состави коалиција за обезбедување на теснецот откако ќе се стабилизира безбедносната ситуација, додека Велика Британија разговара за низа опции со сојузниците за да се обезбеди безбедноста на бродовите, изјавија официјални лица.
Прерано е да се каже дали ЕУ како блок би можела да игра улога во таква иницијатива, изјавија дипломати и официјални лица.
Јапонија и Австралија денеска изјавија дека нема да учествуваат во мисијата во Ормутскиот Теснец.
