Иранскиот претседател Масуд Песекијан бил повреден за време на 12-дневната војна со Израел, според извештај на иранска новинска агенција, пренесува dpa. Иранската новинска агенција Fars објави дека израелските воздухопловни сили го бомбардирале комплексот згради на Советот за национална безбедност на 16 јуни, три дена по почетокот на војната.
Нападот резултирал со прекин на електричната енергија, се вели во извештајот. Учесниците на кризниот состанок успеале да избегаат, но некои, вклучувајќи го и Песекијан, претрпеле повреди на нозете.
Во интервју со американскиот водител на ток-шоу Такер Карлсон пред една недела, Песекијан спомена обид за атентат врз него, наведувајќи евентуално истекување на разузнавачки информации. Постојат шпекулации за инфилтрација од страна на агент, објави Fars.
Во меѓувреме, видео е споделено во иранските медиуми кое наводно прикажува бомбардирања на планински падини западно од Техеран. Израел започна војна против Иран на 13 јуни, погодувајќи цели низ целата земја, вклучувајќи нуклеарни постројки, и убивајќи врвни научници и воени лидери.
Вооружените сили на Иран одговорија со ракетни напади. И двете земји претрпеа жртви, вклучувајќи и цивили.
Нешто повеќе од една недела по почетокот на војната, Вашингтон интервенираше и бомбардираше три од најважните нуклеарни постројки на Иран. По 12 дена напади, неочекувано беше прогласено примирје. Сепак, во Иран расте загриженоста за понатамошни напади.
