Договорот меѓу палестинската група Хамас и Израел беше постигнат претходната недела, а Axios откри дека конечниот договор е постигнат откако американските пратеници Стив Виткоф и Џаред Кушнер имале директна средба со раководството на Хамас.
Иако поголемиот дел од разговорите со Хамас беа спроведени преку посредници, имено Египет и Катар, според извештајот на Axios, директните разговори меѓу американските претставници и претставниците на палестинската група биле клучни.
Виткоф и Кушнер во средата одржаа директни разговори со лидерите на Хамас, каде што пренесоа директни гаранции од американскиот претседател Доналд Трамп дека Израел нема да продолжи со агресијата по ослободувањето на израелските затвореници во Газа.
Денот претходно, Виткоф и Кушнер добија дозвола од Трамп да ги вклучат претставниците на Хамас во разговорите, што на крајот доведе до средба и договор.
Преговарачите од Катар, исто така, одиграа важна улога, доаѓајќи во собата на Виткоф во хотелот „Four Seasons“ во средата и кажувајќи му дека „мора да се сретне“ со претставници на Хамас, што тој го прифатил откако катарските преговарачи истакнаа дека ова ќе биде најбрзиот начин за постигнување договор.
Потоа Виткоф отишол во друг дел од хотелот, каде што се состанувале преговарачи од Турција, Египет, Катар и Хамас. Делегацијата на палестинската група ја предводел Халил ал-Хаја.
За време на состанокот, кој траел околу 45 минути, Виткоф им кажал на претставниците на Хамас дека заложниците сега се повеќе товар отколку предност.
Тој, исто така, рекол дека е време да се продолжи со првата фаза од договорот и да им се овозможи на луѓето да се вратат во своите домови од двете страни на границата, според еден од изворите.
Ал-Хаја прашал дали Виткоф и Кушнер имаат порака од Трамп.
„Пораката на претседателот Трамп е дека ќе бидете третирани фер и дека тој стои зад сите 20 точки од неговиот мировен план и ќе се погрижи тие да бидат имплементирани“, рече Виткоф, според истиот извор.
Кога завршил состанокот, лидерите на Хамас влегле во друга просторија со египетски, катарски и турски медијатори. Неколку минути подоцна, шефот на египетската разузнавачка служба, Хасан Рашад, се вратил со своите турски и катарски колеги.
„Врз основа на состанокот кој штотуку го имавме - имаме договор“, им рекол тој на Виткоф и Кушнер.
Средбата во Шарм ел-Шеик беше вториот значаен директен контакт меѓу администрацијата на Трамп и Хамас.
Во март, американскиот пратеник за заложници, Адам Болер, одржа состаноци со лидерите на Хамас во Доха, барајќи ослободување на американскиот заложник Едан Александер и враќање на телата на уште четворица Американци.
Договорот пропадна делумно поради силното противење од израелската влада, која првично не беше запознаена со директните преговори.
