Воздушниот простор над Иран, Израел, Јордан и Ирак е целосно затворен, а сите комерцијални летови се суспендирани по нападот на Израел врз Иран, според податоците од платформата Flightradar24.
Тековната мапа на воздушниот сообраќај покажува дека нема летови над тие четири земји, што ја потврдува степенот на вонредна состојба во регионот.
Израел, Иран, Јордан и Ирак официјално објавија затворање на воздушниот простор и заземјување на сите летови, додека Ер Франс утрово објави дека ги суспендира летовите до и од Тел Авив до понатамошно известување.
This time-lapse of air traffic over the Middle East shows how civilian airspace cleared after Israel’s operation against Iran began. pic.twitter.com/aap8ilC2MI
— Brady Africk (@bradyafr) June 13, 2025
Да потсетиме дека синоќа Израел изврши обемен воздушен напад врз неколку цели во Иран како дел од операцијата наречена „Исправен лав“. Според израелски воени извори, погодени се објекти поврзани со нуклеарната програма на Иран и воени локации, вклучувајќи го и клучниот комплекс за збогатување ураниум во Натанц. МААЕ потврди дека Натанц е меѓу нападнатите локации и е во контакт со иранските власти за следење на нивото на зрачење.
Израелскиот премиер Бенјамин Нетанјаху изјави дека целта на операцијата е да се „неутрализира егзистенцијална закана“, истакнувајќи дека Иран со години развива нуклеарни капацитети и отворено се заканува дека ќе го уништи Израел. Иран го затвори својот воздушен простор, а израелската војска го зголеми нивото на тревога за можен одговор, вклучително и лансирање беспилотни летала и ракети од Иран и територии контролирани од проирански групи.
