Наезда од скакулци во Украина: Последица на војната

Наезда од скакулци ги уништува јужните и источните делови на Украина загрозувајќи ги посевите во регионите Запорожје, Днепар, Херсон и Одеса.

Експертите го поврзуваат ова со климатските промени и катастрофата на браната „Каховка“.

Висок украински функционер за масовната појава на скакулци ја обвинува руската инвазија. Во разговор за украински новински портал, Вадим Чајковскиј, заменик-директор на Државната служба за безбедност на храната и заштита на потрошувачите, истакна дека скакулците станаа значаен проблем во областите погодени од војната во Украина од почетокот на руската агресија во 2022 година.

„Ова е последица на војната“, нагласи Чајковскиј. „Напуштените земјишта по линијата на фронтот и уништувањето на хидроцентралата ‘Каховка’ создадоа идеални услови за нивно размножување“, рече тој.

Чајковскиј го издвои резервоарот „Каховка“ како извор на наезда од скакулци. Во 2023 година руските сили срушија брана, што доведе до сушење на резервоарот и создавање соодветно живеалиште за овие инсекти. „Сакам да нагласам дека рускиот екоцид е главната причина за оваа инвазија“, додаде Чајковски. „Намалувањето на коритото на реката Днепар во јужните региони создаде идеални живеалишта за скакулци, речни брегови и напуштени области. Изобилството на такво земјиште, особено минираните области, им оневозможува на цивилите да се борат против овие штетници“, додаде тој.