Во судир меѓу два брзи воза во Адамус, во близина на Кордоба, Шпанија, загинаа најмалку 39 лица, а повеќе од 150 се повредени. Трагичната несреќа се случила кога еден од возовите излетал од шините и преминал на соседната пруга.
Несреќата се случила вчера околу 19:40 часот кога последните три вагони од возот Iryo, кој превезувал 317 патници на линијата Малага-Мадрид, излетале од шините на влезот во Адамус. Вагоните преминале на соседната пруга, на која во тој момент минувал возот Renfe од Мадрид до Уелва во спротивна насока, со брзина од околу 200 км/ч, што, исто така, предизвикало и негово излегување од шините.
Возот Iryo бил произведен во 2022 година, и последен пат бил проверен на 15 јануари. Несреќата се случила на рамен дел од пругата, што го потврди и министерот за транспорт, Оскар Пуенте.
Во возот имало 294 лица, вели компанијата што го поседува возот што прв излета од шините. Петмина се во критична состојба, а 24 лица се сериозно повредени. Според информациите од Цивилната гарда и владата на Андалусија, сведоштвата на преживеаните зборуваат за хаос, заробени патници и згмечени и превртени вагони, објавува El País.
Поради сериозната несреќа, премиерот на Шпанија, Педро Санчес, ја откажа посетата на Светскиот економски форум, кој се одржува во Давос, Швајцарија, од 19 до 23 јануари.
Санчес ги откажа сите планирани обврски за добивање информации од прва рака за ситуацијата по излетувањето на два брзи воза што се случи вчера.
