Нетанјаху го осуди сквернавењето на статуа на Исус од страна на војник на ИДФ во Либан

Израелскиот премиер, Бенјамин Нетанјаху, изјави дека е згрозен и тажен од видеото на кое се гледа како израелски војник очигледно уништува статуа на Исус со чекан, во Јужен Либан.

„Го осудувам овој чин најостро“, напиша Нетанјаху во објава на социјалната мрежа X.

Нетанјаху, исто така, ги објави следните чекори.

„Како еврејска држава, Израел ги негува и ги поддржува еврејските вредности на толеранција и меѓусебно почитување меѓу Евреите и верниците од сите вери. Сите религии цветаат во нашата земја и ние ги сметаме членовите на сите вери за рамноправни во градењето на нашето општество и регион.

Вчера, како и огромното мнозинство Израелци, бев запрепастен и тажен кога дознав дека војник од ИДФ оштетил католичка верска икона во Јужен Либан. Најостро го осудувам чинот. Воените власти спроведуваат кривична истрага за случајот и ќе преземат соодветни строги дисциплински мерки против сторителот.

Додека христијаните се масакрирани во Сирија и Либан од страна на муслиманите, христијанското население во Израел напредува за разлика од другите места на Блискиот Исток. Израел е единствената земја во регионот каде што христијанското население и животниот стандард растат. Израел е единственото место на Блискиот Исток кое се придржува до слободата на вероисповед за сите. Изразуваме жалење за инцидентот и за секоја штета што им ја нанесе на верниците во Либан и низ целиот свет“, вели премиерот на Израел.

Американскиот амбасадор во Израел, Мајк Хакаби, исто така, го осуди инцидентот претходно, барајќи „брзи, строги и јавни последици“. Израелскиот министер за надворешни работи го опиша настанот како „сериозен и срамен“.

За инцидентот регираше и ИДФ, која соопштија дека статуата ќе биде поправена и вратена на нејзиното место.

„По завршувањето на првичниот преглед во врска со фотографија објавена претходно денес на војник од ИДФ како повредува христијански симбол, беше утврдено дека фотографијата прикажува војник од ИДФ како дејствува во Јужен Либан.

ИДФ го гледа инцидентот со голема сериозност и нагласува дека однесувањето на војникот е целосно неконзистентно со вредностите што се очекуваат од неговите војници.

Инцидентот го истражува Северната команда и моментално се решава преку командниот синџир. Ќе бидат преземени соодветни мерки против вклучените лица во согласност со наодите.

Понатаму, ИДФ работи на помагање на заедницата во враќањето на статуата на нејзиното место.

ИДФ работи на демонтирање на терористичката инфраструктура воспоставена од Хезболах во Јужен Либан и нема намера да ѝ наштети на цивилната инфраструктура, вклучително и религиозни објекти или религиозни симболи.“

Градот Дебел, населен со христијанско население, објави дека статуата е нивна и воедно напиша: „Исус рече: 'Оче, прости им, зашто не знаат што прават.' - Лука 23:34.“