Нобеловата награда за мир за 2025 година ја доби Марија Корина Мачадо од Венецуела

Нобеловата награда за мир за 2025 година ја доби Марија Корина Мачадо, опозициска политичарка од Венецуела, соопшти норвешкиот Нобелов комитет. Таа е опозициска политичарка која се бореше против репресивното владеење на венецуелскиот претседател Николас Мадуро.

Претходно беа доделени Нобеловите награди за физика, хемија, медицина и литература, а добитникот на наградата за економија сè уште не е објавен.

Марија Корина Мачадо е 58-годишна политичарка и индустриски инженер од Венецуела, позната по својата голема борба против диктатурата во оваа земја.

Таа се вклучи во политиката во 2002 година, а денес се смета за лидер на опозицијата против режимот на Мадуро.

Мачадо првпат се кандидираше за претседател во 2012 година, но потоа загуби на прелиминарните избори во рамките на опозицијата.

По 12 години, таа размислуваше повторно да се кандидира, но се повлече во корист на Корина Јорис, која подоцна беше заменета со Едмундо Гонзалез Урутија.

Мачадо беше лицето на протестите во Венецуела откако опозицијата прогласи победа над Мадуро. Државните власти прогласија победа на Мадуро и одговорија на протестите со насилство.

Поради заканите што доаѓаа од режимот на Мадуро, Мачадо го напушти јавниот простор на 1 август 2024 година, а во писмо до Wall Street Journal изјави дека морала да се скрие поради ризик од апсење или атентат.

Кога првпат се појави во јавноста во јануари оваа година, силите на Мадуро се обидоа да ја уапсат, но не успеаја. Тие испукаа неколку куршуми во нејзиниот автомобил.

За потсетување, Мачадо ја освои наградата пред голем број светски личности, вклучувајќи го американскиот претседател Доналд Трамп, украинскиот лидер Володимир Зеленски и шведската активистка Грета Тунберг.