Која авиокомпанија нуди најдобра услуга, најкомфорна економска класа и најголемо чувство на безбедност? Самите патници го дадоа одговорот, а резултатите од овогодинешниoт избор донесоа убедлива победа на азиските превозници. Европските авиокомпании останаа во втор план.
Секоја година се објавуваат различни рангирања на авиокомпании, од оние што се сметаат за најбезбедни до оние што летаат најчесто. Сепак, повеќето од овие листи се базираат на оценки од експерти. Овој пат, ситуацијата е поинаква: новото рангирање се базира исклучиво на гласовите на патниците.
Наградите Flyers' Choice Awards 2026, организирани од AirlineRatings.com, ги опфати најдобрите авиокомпании во различни категории, вклучувајќи ги Омилен нискобуџетен превозник, Најдобар дизајн на авион, Најдобра униформа за кабински персонал, Најдобра бизнис класа и Најдобра економска класа.
Оваа година, едно име особено се издвои - Singapore Airlines.
Компанијата освои 4 награди: за Омилена авиокомпанија во економска класа, Најдобра услуга на кабинскиот персонал, Најдобра авиокомпанија во Централна и Југоисточна Азија, како и за Превозник кој им обезбедува на патниците најголемо чувство на безбедност и спокојство.
„Имаме голема среќа што живееме во свет каде што патниците имаат толку многу авиокомпании што им нудат безбедни, сигурни и смирувачки искуства“, рече Шерон Питерсен, извршна директорка на AirlineRatings.com.
Таа истакна дека резултатите на компании како Singapore Airlines и Qantas во категоријата поврзана со чувството на безбедност и доверба се особено значајни, бидејќи покажуваат колку е важна довербата што превозниците ја изградиле со своите патници во текот на годините.
„Довербата во авиокомпанијата се гради со текот на времето, а овие резултати покажуваат колку конзистентноста во квалитетот значи за патниците“, рече Питерсен.
Кога станува збор за европските превозници, резултатите не беа особено импресивни.
Британската easyJet го подели третото место меѓу најдобрите нискобуџетни авиокомпании во светот со австралиската Jetstar. Виетнамската Vietjet Air се најде на првото место, додека AirAsia беше втора.
Категоријата Авиокомпанија што обезбедува најголемо чувство на безбедност и безгрижност беше единствената во која беа објавени повеќе од три најдобри места. Единствениот европски авиопревозник што се пласираше меѓу првите шест беше airBaltic, на шестото место. Пред него се најда Singapore Airlines, Qantas и Etihad Airways.
Европските авиокомпании не успеаја да освојат водечки позиции во категориите за Најдобар дизајн на авиони, Најдобра бизнис класа, Најдобра премиум економска и економска класа, Најдобра униформа за кабински персонал и Најдобра услуга од кабински персонал.
Сепак, кога станува збор за омилени авиокомпании во Европа, патниците најмногу ги издвоија British Airways, Lufthansa и KLM.
Комплетните резултати можете да ги погледнете тука.
