Пилот изврши итно слетување во Атлантикот, сите се спасени

Пилотот Иан Никсон никогаш не доживеал нешто слично на драмата што го остави него и 10 патници да пловат во Атлантскиот Океан со часови чекајќи спасувачи покрај источниот брег на Флорида. Сите 11 лица беа спасени откако Никсон беше принуден да го спушти авионот на површината на морето за време на лет помеѓу два острова на Бахамите, пишува BBC.

Драмата се одвиваше завчера, на лет од Марш Харбор на островите Абако на Бахамите и Фрипорт на Гранд Бахама, што требаше да биде рутински, 20-минутен лет. Но, кратко по полетувањето, почнале да се појавуваат дефекти еден по друг. Прво откажал навигацискиот систем, потоа радиото, а потоа еден по еден мотор.

„Некое време не можев да се поврзам со никого. Се обидував да се поврзам со Фрипорт, се обидував да се поврзам со радиото во Мајами. Не знам дали воопшто ме слушнаа, но немаше одговор“, изјави Никсон за CBS News.

Без писта во близина, пилотот од Бахамите ја донел единствената одлука што можел и направил принудно слетување на вода околу 289 километри северно од Мајами. Тоа бил маневар изведен како последно средство кога немало други опции.

„Штом ја допрев водата, мојата прва мисла беше: 'Не сме мртви'“, рече Никсон.

Следеле часови неизвесност на сплавот за спасување, каде што пилотот и патниците чекале спасувачите да ги пронајдат. Никсон се обидувал да го одржи моралот. „Им реков: 'Авионот ќе биде тука за 10 минути“, се присети тој. „Потоа еден од патниците рече: ‘Чекајте, дали слушам нешто?’“

Тоа ил оддалечен звук на хеликоптер од 920-тото спасувачко крило на американските Воздухопловни сили. Единицата била на мисија за обука кога била пренасочена кон пребарување и спасување откако крајбрежната стража на САД добила сигнал за помош од локаторот на авионот.

„Тие беа на сплавот околу 5 часа“, рече капетанот Рори Випл. „Веднаш можеше да се каже дека се во сериозна состојба – физички, ментално и емоционално исцрпени.“ Спасувачите се тркале со времето за да ги префрлат сите патници на безбедно пред хеликоптерите да мораат да се вратат за да наполнат гориво.

„Не познавам никого што некогаш преживеал принудно слетување во океанот“, рече мајорката Елизабет Пјовати, командантка на авионот што учествувал во спасувањето. „И од она што го видов, чудо е што сите тие луѓе преживеаја“.

Сите 11 лица беа однесени во болница во Флорида, а тројца од нив претрпеа полесни повреди. „Сите бевме толку среќни кога нè спасија бидејќи мислевме дека ќе умреме“, рече Олимпиа Аутен, една од патниците. „Беше како од филм“. Бахамските власти започнаа истрага за да ја утврдат причината за несреќата.