Нов научен извештај, објавен во средата, откри дека ледените покривки на Гренланд и Антарктикот изгубиле приближно 12,5 трилиони тони мраз од 1979 година, што дополнително го подигнало нивото на морето ширум светот.
Според студија објавена во списанието Scientific Data, глобалното затоплување го забрзува топењето на двете најголеми ледени покривки на Земјата. Авторите наведуваат дека пет шестини од загубата на мраз не се предизвикани од потопол воздух, туку од потопла морска вода што го нагризува мразот одоздола и од страните додека глечерите се влеваат во океанот.
Коавторот на студијата, Ерик Рињо, научник од Универзитетот „Калифорнија“ во Ирвајн, предупреди на обемот на промените: „Ледените покривки брзо се топат. Ги топиме поларните региони; нивото на морето расте ширум светот, што дополнително ќе ја зголеми ранливоста на крајбрежните области“.
Стопениот мраз се претворил во речиси 3 квадрилиони галони – или 11,3 квадрилиони литри – вода, со што глобалното ниво на морето се зголемило за околу 3,1 сантиметар од 1979 година, покрај другите климатски фактори што исто така придонесуваат за покачувањето на нивото на океаните.
Главниот автор Инес Отосака од Универзитетот „Нортамбрија“ изјави дека секој дополнителен сантиметар покачување на нивото на морето изложува нови 2 до 3 милиони луѓе на ризик од поплави, најмалку еднаш годишно.
Истражувањето покажува дека ледените покривки биле релативно стабилни во текот на 70-тите, 80-тите и дел од 90-тите години, но потоа започнало топење кое нагло се забрзало во текот на 2010-тите. Отосака исто така истакна дека глечерот Јакобсхавн на Гренланд сега се повлекува и до 50 метри дневно.
Меѓународен тим од поларни научници, предводен од Европската вселенска агенција, искористил 45 независни мерења и 27 сателити. Со вклучување на податоци од сателитите на НАСА, истражувачите успеале да ги следат промените на Антарктикот уште од 1979 година, а на Гренланд од 1972 година.
Коавторот Ендрју Шеферд предупреди дека овие промени доцнат со децении зад глобалното затоплување, што значи дека веројатно ќе продолжат дури и ако затоплувањето на планетата запре. Авторите додаваат дека очигледното забавување забележано помеѓу 2020 и 2023 година е повеќе поврзано со краткорочни временски варијации отколку со промена на долгорочен тренд.
