Шпанија повика на создавање армија на Европската Унија како замена за заштитата што ја обезбедува НАТО, а нејзиниот министер за надворешни работи, Хосе Мануел Албарес, сугерираше дека блокот можеби повеќе нема да може да се потпре на воениот сојуз предводен од САД за безбедносни гаранции. Според Албарес, доколку ЕУ не се потпираше на НАТО, Доналд Трамп немаше да може да ја уценува нејзината безбедност, пишува Politico.
Мадрид се најде на првата линија на трансатлантскиот спор меѓу американскиот претседател Трамп и неговите европски сојузници. Трамп се закани дека ќе воведе дополнителни трговски тарифи за Шпанија поради нејзиното одбивање да ги зголеми трошоците за одбрана на 5% од бруто домашниот производ (БДП).
Исто така, навести дека би можел да ги повлече американските трупи од базите во Шпанија или дури и да ја суспендира земјата од НАТО затоа што шпанскиот премиер Педро Санчес не ја поддржа неговата војна против Иран. „Не можеме секое утро да се будиме прашувајќи се што ќе прават САД следно, нашите граѓани заслужуваат подобро“, изјави Албарес за Politico.
„Ова е момент за европски суверенитет и независност. Самите Американци го бараат тоа“, додаде тој. „Треба да се ослободиме од зависноста. А, тоа значи да бидеме ослободени од принуда, без разлика дали станува збор за царини или воени закани. И ослободени од последиците од одлуките на другите луѓе.“
Во Брисел има многу дискусии за тоа како да се одговори на очигледниот недостаток на интерес на Трамп за НАТО. Многу од тие дискусии се фокусираат на тоа што ЕУ може да направи повеќе за сопствената безбедност, со оглед на тоа што 24 нејзини членки се исто така дел од воениот сојуз.
Албарес верува дека блокот треба да има своја верзија на Член 5 на НАТО, клаузулата за заемна одбрана која вели дека нападот врз еден сојузник е напад врз сите. „Магијата на НАТО е во тоа што сте член и ништо не ви се случува затоа што никој не се осмелува да провери дали Член 5 навистина функционира“, рече тој.
„Токму тоа е она што треба да го створиме – одвраќањето. Пораката дека ако некој сака да се задева со мене, нека оди некаде на друго место. Затоа што ние ќе бидеме еден.“
Министрите за надворешни работи и одбрана на ЕУ треба да разговараат за воената независност на одделни состаноци во Брисел оваа недела. Пред нивниот прв состанок, шефицата за надворешна политика на ЕУ, Каја Калас, го отфрли предлогот на Владимир Путин, поранешниот германски канцелар Герхард Шредер да ја претставува Унијата во директни разговори со Москва.
„Ако ѝ дадеме на Русија право да назначи преговарач во наше име, знаете, тоа не би било многу мудро“, рече Калас. Таа нагласи дека Шредер е „високо рангиран лобист за руските државни компании, па затоа е јасно зошто Путин сака тој да биде таа личност – да седи од двете страни на масата“.
