Американскиот претседател Доналд Трамп изјави дека на американските воени и трговски бродови треба да им се дозволи слободен премин низ Панамскиот и Суецкиот Канал бидејќи „тие канали не би постоеле без Соединетите Американски Држави“.
„Го замолив државниот секретар Марко Рубио веднаш да се погрижи за оваа ситуација“, напиша Трамп во објава на мрежата Truth Social.
Панамскиот Канал го преминува најтесниот дел од теснецот помеѓу Северна и Јужна Америка, овозможувајќи им на бродовите да се движат побрзо помеѓу Атлантскиот и Тихиот Океан. Околу 40 проценти од американскиот контејнерски сообраќај поминува низ него секоја година.
САД ја завршија изградбата на каналот на почетокот на 20 век, но во 1999 година ја предадоа контролата врз стратешки важниот воден пат кон Панама.
Трамп постојано повторуваше дека сака да го „врати“ каналот. Пред да ја преземе функцијата во јануари, тој им рече на новинарите дека не ја исклучува можноста за употреба на економска или воена сила за да ја врати контролата врз каналот.
