Хабиб Нурмагомедов вчера го шокира светот откако по победата над Џастин Гејџи најави дека ќе се повлече од борбите. Одлуката ја донесе по барање на мајка му, а една од причините за заминување во пензија е и смртта на неговиот татко, кој му беше тренер и многу важна личност во неговиот живот.
Многу малку се знае за приватниот живот на Дагестанецот, а најмалку се знае за неговата сопруга, со која има три деца.
Вистинско освежување на социјалните мрежи е снимката која повторно стана актуелна за Нурмагомедов, стара 23 година. На неа го гледаме 9-годишниот Хабиб како се бори со мечка. Да, со мечка. Тоа се почетоците на борачот кој вчера победи со резултат од 29-0.
Со победата над Американецот, Хабиб ја заврши кариерата со четири појаси на УФЦ шампион и се прости од рингот.
„Ветив дека ова ќе ми биде последна борба. Морам да си го одржам зборот“, изјави Хабиб вчера во Абу Даби.
Нам ни останува да се потсетиме како се челичеше овој неверојатен млад човек.
