Јован Јованов и Елвир Мекиќ по 16 години повторно снимија заедничка песна

Пред 16 години ја раздвижија музичката сцена со нивната „Слаба точка“, а сега Јован Јованов и Елвир Мекиќ снимија нов дует, песната „Адреналин“.

Песната со брз ритам и заразен звук освојува на прво слушање.

„Заедничка беше идејата да снимиме дует по толку време. Песната се создаде на почетокот на оваа година. Како автори се јавуваме ние двајцата, Христијан Настески и Пајак и брат ми Иван Јованов. Првиот план беше таа да се промовира пред летото, но поради други околности, ја оставивме за наесен“, вели Јован.

„Среќен сум и возбуден што по толку време имаме заеднички проект, што пуштивме нешто што личи на нас од минатото, а сепак со нов и модерен призвук. Со нетрпение ги чекам реакциите и се надевам дека песната ќе ѝ се допадне на публиката“, додава Елвир.

Песната беше промовирана заедно со музички спот, кој е снимен во Штип, а на кој работеше екипата на „Урбан рекордс“.