Виенското туристичко биро отвори профил на страницата за возрасни OnlyFans со изговор дека тоа очигледно е единственото место каде нивните музеи ожат да ја објават својата гола уметност.
Австрискиот главен град Виена е дом на некои од најпознатите светски уметнички дела, а многу од нив прикажуваат голотија.
„Најпопуларните социјални мрежи имаат политика на неприкажување и цензурирање на таквите дела“, велат од Vienna Tourist Board, објаснувајќи зошто се решиле на ваквиот чекор.
Откако веќе се зачлени на OnlyFans, виенската уметност доби и промотивно видео на кое се прижани разголените дела од Петер Паул Рубенс и Егон Шиле со кои се наведуваат посетителите да ги посетат за да видат повеќе од оваа уметност.
Музеите Албертина, Леополд, Уметничкиот Музеј и Природонаучниот Музеј се дел од OnlyFans проектот. Тие од неодамна станаа жртви на новиот бран на „чистота“ кој почна да доминира по социјалните мрежи и се цензурирани насекаде онлајн, а личните профили кои ги објавуваат нивните „контроверзни“ дела добиваат казни.
Во јули, TikTok профилот на музејот Албертина беше блокиран поради објавување на дело од јапонскиот фотограф Нобујоши Арака, на кое се гледаше замаглена женска дојка. Во 2019 година истиот музеј беше нападнат од Instagram поради прекршување на стандардите откако имаше објавено слика од Рубенс.
Музејот Леополд годинава си отвори проблем со Facebook и Instagram откако објави промотивно видео кое вклучуваше дела од Коломан Мозер и кои алгоритмите на овие социјални мрежи ги обележаа како порнографски материјал.
Најнелогичната и воедно смешна цензура се случи во 2018 кога Facebook ја избриша од профилот на Природонаучниот Музеј сликата од 25 илјади години старата фигурина наречена Венера од Вилендорф, со објаснување дека се работи за порнографски материјал.
Сите оние кои ќе се зачленат на OnlyFans профилот на виенските музеј ќе добијат карта за разгледување на градот и бесплатен билет за влез во еден од музеите каде ќе можат на лице мест да видат дел од овие „срамотни“ дела.
