Италијанската легенда го опиша Меси како волшебник по синоќешната победа на Барса среде Торино.
„Барселона беше неверојатна, не ни имаше надигрување. Тие лесно можеа да постигнат 6-7 голови. Играат фантастично“, почнува Кристијан Виери говорејќи за CBS Sports.
Очигледно импресиониран од синоќешната партија на Барса, поранешниот голгетер на Интер не трошеше зборови за аргентинскиот ас.
„Меси е волшебник, тој е фудбалскиот Хари Потер и кога ќе замине во пензија јас ќе го фрлам телевизорот. Нема повеќе да работам на ТВ, ќе си гледам Netflix. Така ќе биде бидејќи кога тој ќе престане да игра ќе нема што да се гледа“, вели популарниот Бобо кој по пензионирањето работи како стручен коментатор во beIN Sports, а често гостува и по спортски емисии.
„Не знам како изгубија од Реал Мадрид, но ако ги гледавте против Јуве ќе си помислевте дека сезонава не можат да изгубат од никој. Тоа е немозможно е според начинот на кој играа“.
Виери кариерата ја заврши во 2009 година во дресот на Аталанта. Против Барса играше во сезоната 1997/98 кога ги бранеше боите на мадридски Атлетико, но против барса на Меси никогаш не играше.
„Секој натпревар е различен, но оваа Барселона која ја видов и која сите ја видоа е едноставно неверојатна. Кога имаш таква десетка, лудо е. Штета е што немаше публика бидејќи фановите треба да гледаат тимови како нив“.