Британскиот принц Вилијам се осврна на милијардерите вклучени во трката за вселенски туризам, порачувајќи дека треба да се фокусираат на решавање на еколошките проблеми со кои се соочува планетата Земја.
Во интервју за BBC Вилијам ги критикуваше Џеф Безос, Илон Маск и Ричард Бренсон, кои се соперници во борбата за вселенски потфати како дел од почетокот на новата ера на приватните комерцијални вселенски патувања.
„Потребни се некои од најголемите светски умови кои се обидуваат да ја поправат оваа планета, а не да се трудат да пронајдат следно место за населување“, изјави Вилијам за вселенската трка.
Неговите коментари доаѓаат откако Маск зборуваше за мисиите на Марс, а Безос го опиша првиот лет во вселената како дел од изградба на патот кон иднината со цел следните генерации да изградат живот токму таму.
„Мораме да го направиме тоа за да ги решиме проблемите овде на Земјата“, изјави Безос кој вчера го прослави летот во вселената на актерот Вилијам Шатнер, познат по улогата на капетан Кирк во серијата „Star Trek“.
