Скопје, 12 ноември 2019 (МИА) – Владата ги повлекува предлог-измените на Законот за јавни собири и порачува дека има простор за разговори и подобрувања согласно со Уставот.
– Владата на Република Северна Македонија ги слушна забелешките на граѓанските организации за најавените предлог измени на Законот за јавни собири и на денешната 164-та седница одлучи да ги повлече предлог-измените со цел да се обезбеди поширока консултација, соопшти владината прес-служба.
Владиниот кабинет смета дека има простор за разговори и за подобрување на содржината со цел, како што потенцираат, овозможување слобода на изразување на став на јавни простори низ јасно утврдени регулативи и исклучиво во согласност со Уставот на РСМ.
Премиерот Зоран Заев одговорајќи на новинарско прашање на прес-конференција посветена на Буџетот за 2020 година, рече дека ги слушнале реакциите на граѓаните и дека веднаш реагирале.
– Ги слушнавме реакциите на граѓаните и веднаш реагиравме. Ќе ги слушнеме граѓаните, невладиниот сектор, ќе видиме како демократиите го прават тоа. На седницата на која почна денеска за буџетот, донесовме одлука веднаш и го повлековме законот, изјави премиерот.