Фудбалерот на Реал Сосиедад, Микел Ојарзабал, стана херој на шпанската репрезентација во финалето на ЕУРО против Англија постигнувајќи го победничкиот гол за триумф од 2:1, но тоа што тој го постигна голот не им се допадна на сите во Шпанија.
Имено, група непознати лица поставија транспарент во баскиската општина Елорио, родниот град на мајката на Ојарзабал, со кои порачаа дека не ја прифаќаат репрезентацијата на Шпанија.
„Не, за прифаќање на шпанскиот тим“, пишуваше на транспарентот на кој со црно беше прецртано шпанското знаме, а покрај него беше истакнато баскиското знаме.
Под транспарентот се појавија имињата на фудбалерите на Реал Сосиедад, Микел Мерино и Микел Ојарзабал придружени со зборот „предавници“ на баскиски јазик со пречкртана свастика. И двајцата се етнички Баскијци.
И генералниот координатор на баскиската националистичка партија Еускал Хериа Билду, Арналдо Отеги, изјави дека нема и никогаш нема да ја слави победата на Шпанија, бидејќи од негова гледна точка таа него не го претставува.
„Тоа не е мој тим, не е мој крал и не е мојата химна“, рече тој.
Да потсетиме, Шпанија по четврти пат стана европски првак, откако во големото финале на ЕУРО 2024 заслужено ја совлада Англија со 2:1.
„Црвената фурија“ на тој начин стана најтрофејниот тим на Стариот континент со 4 шампионски титули, а до синоќа беше израмнета со Германија со по 3 титули.
