Автобус со регистарски таблички од Шабац, Србија во кој се превезувале 48 деца, излетал од автопатот Тракија во Бугарија и се превртел во ендек при што има повредени.
На местото на настанот пристигнале возила на брза помош, пожарна и неколку полициски возила. Според првичните информации, најмалку 17 лица се повредени.
Сите патници се државјани на Србија. Несреќата се случила на 216 километри во правец на Софија, кај Стара Загора. Децата биле учесници на фолклорен фестивал во Несебар, јавија српски медиуми.
Две деца ќе бидат пренесени во болницата Пирогов во Софија. Во болницата во Стара Загора има 14 лица – двајца возрасни и 12 деца.
Две од децата се во тешка состојба. Едното сега е стабилизирано и е контактибилно, но ќе биде потребна операција. Во 9:00 часот детето ќе биде пренесено во Софија на детска хирургија, додека другото дете има трауматски шок и траума на горен екстремитет. Неговата состојба е малку влошена. Ќе се транспортира до „Пирогов“, соопшти министерот Асен Меџидиев.
На еден возрасен му е ампутиран екстремитет, изјави министерот за здравство.
Оние кои се во добра состојба со амбулантно возило ќе бидат пренесени на граница каде ќе бидат преземени од српска страна.
Министерот за здравство на Србија, Златибор Лончар во текот на ноќта замина во Бугарија за да ги посети повредените и со бугарските колеги да разговара за понатамошните чекори во нивното лекување и дали е потребна дополнителна помош за повредените.
Во текот на ноќта на местото на несреќата пристигнаа главниот обвинител на Бугарија, Иван Гешев и неговиот заменик Борислав Сарафов, кој е и директор на Националната истражна служба, за да се запознаат со текот на истрагата.
„За жал, имаме хронични проблеми и со патиштата и со ознаките на патиштата. Од обвинителството повеќепати ни е кажано дека имаме проблеми со возачите кои управуваат со моторни возила откако консумирале алкохол и дрога“, изјави тој.
Бугарските медиуми објавија снимки и фотографии од местото на несреќата.
