Италијанската полиција денеска уапси 50 луѓе и покрена истрага против истакнатиот политичар Лоренцо Џезе, во рамки на акцијата против моќната мафија Ндрангета.
– Истрагата јасно го открива она што го зборувавме со децении. Ндрангета помалку употребува оружје, но има сè повеќе врски со бизнисот и политиката, изјави обвинителот Никола Гратери, кој минатата недела го започна едно од најголемите судења во Италија.
Читајте следно: Историски процес: 350 мафијаши на Ндрангета изведени пред суд во Италија
Меѓу оние кои се под истрага е и Лоренцо Џеза, лидер на малата партија Унија на демохристијаните и центарот (УДЦ), кој минатата недела го привлече медиумското внимание откако ја одби понудата на премиерот Џузепе Конте да се приклучи на владејачката коалиција, која го загуби апсолутното мнозинство во Парламентот.
Гратери истакна дека Џеза е осомничен дека нудел бизнис договори за Ндрангета во замена за услуги.
Џеза, кој во Европскиот парламент ја застапува јужна Италија, ги отфрли обвинувањата, но рече дека ќе поднесе оставка од претседателската функција во партијата.
Полицијата во Калабрија соопшти дека во текот на оваа акција извршила повеќе од 250.000 прислушкувања на телефони и тајни снимки кои помогнале да се покаже како припадниците на Ндрангета користеле повеќе водечки компании за перење пари и отворање лажни сметки за даночни измами.
На судењето, кое почна минатата недела, на обвинителна клупа се најдоа 355 осомничени припадници на криминалната организација и нивни помагатели од светот на бизнисот и политиката.
