Илјадници увезени комарци беа пуштени во Истра, поточно во Премантура и Медулин. Станува збор за стерилни машки тигрести комарци од чии убоди не треба да се стравува, бидејќи ослободувањето на таквите комарци има за цел да го намали нивниот број.
Овој пилот проект има за цел преку стерилни единки да ја намали популацијата на тигрести комарци.
„Тоа е инвазивен странски вид кој се населил овде и станал доста прилагоден, и ги поместува нашите родни видови, а исто така е потенцијален носител на болести“, изјави за HRT ветеринарката Ивана Кирин.
Со имплементација на нов метод за борба против комарци, таканаречена SIT техника, ќе се намали ризикот од болести. Недиљко Ландека од Наставниот Институт за јавно здравје Иж вели дека тоа е биолошки прифатлив метод.
„Тоа е прифатливо и за животната средина бидејќи не се испуштаат пестициди. По парењето на стерилните мажјаци и дивите женки што ќе ги најдат таму, јајце клетките нема да се оплодат и бројот нема да се зголемува“, објаснува Ландека. По пуштањето во дивината, состојбата ќе се следи на два начина.
„Комарците што ги пуштаме секој понеделник добиваат посебна боја за кога повторно ќе ги фатиме да можеме да кажеме од каде дошле, од кој датум бил тој комарец и колку долго успеал да преживее“, нагласува Ландека.
Ветеринарката Кирин вели дека ќе се намали и бројот на комарци со поставување стапици. Таа наведува дека во моментов во Премантура ги има 20.
„Тоа е една даска во вода на која женките ги положуваат јајцата“, објасни Кирин за HRT.
Секој понеделник, до 1 август, ќе бидат пуштени 50.000 стерилни единки. Целта е да се намали популацијата на тигрестите комарци во областа на округот Истра, како и да се намали употребата на инсектициди во животната средина.