Највисоки трошоци на домаќинствата за потрошувачка во ЕУ во 2023 година се забележани во Данска, каде што се 143 отсто од просекот на ЕУ, а најниски во Бугарија и Романија, објави денеска Евростат.
Највисоки трошоци на домаќинствата потоа имаат Ирска 142 отсто и Луксембург 135 отсто.
Најниски трошоци за домаќинствата се забележани во Бугарија и Романија, по 60 отсто во споредба со просекот на ЕУ, а во Полска 66 отсто.
Најголема разлика во цените е забележана кај алкохолот и тутунот.
Во 2023 година, нивото на цената на алкохолот и тутунот беше 3,2 пати повисоко во Ирска, каде што беше најскап, отколку во Бугарија, каде беше најевтин.
Најниски цени на алкохолот и тутунот се забележани во Бугарија (66 отсто од просекот на ЕУ), Полска 77 отсто и Романија 85 отсто.
Во меѓувреме, највисоки нивоа се забележани во Ирска со 211 отсто, Финска со 170 отсто и Данска со 133 отсто. Оваа голема варијација во цената главно се должи на разликите во оданочувањето на овие производи, наведува Евростат.
Рестораните и хотелите се рангирани на второ место по разликата во нивото на цените, со најниски нивоа на цени регистрирани во Бугарија (52 отсто од просекот на ЕУ), Романија (65 отсто) и Унгарија (72 отсто), а највисоки во Данска (152 отсто), Финска (129 проценти) и Ирска (128 проценти).
Облеката е рангирана на третото место според варијациите на нивото на цените, со најевтини цени на облеката во Шпанија (81 отсто), Бугарија (82 отсто) и Унгарија (88 отсто), додека најскапи биле во Данска (131 отсто), Чешка (126 отсто) и Естонија (118 проценти).
Разлики се забележани и за храната и безалкохолните пијалоци, кои се разликуваат од 74% од просекот на ЕУ во Романија до 119% во Луксембург, опремата за личен транспорт која варира од 90% во Словачка до 129% во Данска и потрошувачката електроника (од 92% во Италија до 113 проценти во Франција).
