Колумбиските поморски офицери кои го надгледуваа местото на бродоломот на галијата „Сан Хосе“ открија уште два одамна потонати брода во близина, изјави колумбискиот претседател Иван Дуке.
Галијата „Сан Хосе“, за која историчарите веруваат дека носела богатства што денес би вределе милијарди долари, потонала во 1708 година во близина на колумбискиот пристанишен град Картагена. Потенцијалното извлекување на потонатиот брод е предмет на тужби со децении.
Подморница со далечинско управување која нурна на длабочина од 900 метри откри нова снимка од потонатата галија, изјавија Дуке и поморските офицери во видеопорака.
Подморницата открила уште два потонати брода во непосредна близина - колонијален брод и пловило за кои се верува дека се од истиот историски период, Колумбиската војна за независност од Шпанија, пред околу 200 години.
„Сега имаме две нови откритија во истата област, кои претставуваат нови можности за археолошки истражувања. Така, работата допрва започнува“, рече адмиралот Габриел Перес.
Новите снимки од „Сан Хосе“ го дадоа најдобриот увид во богатството кое оваа галија го носеше досега. Беа снимени златни плочки, златни монети, топови направени во Севиља во 1655 година и зачувани порцелански садови.
„Идејата е да се собере сето ова и да се создаде одржлив финансиски механизам за идни истражувања. На овој начин ќе го заштитиме богатството, наследството на галијата 'Сан Хосе'“, рече претседателот Иван Дуке.
