Првата бивалентна засилувачка вакцина на Moderna против коронавирусот е одобрена за употреба во Обединетото Кралство, соопшти денеска Британската Регулаторна агенција за лекови и здравствени производи (МХРА).
Оваа прилагодена вакцина таргетира две различни варијанти на коронавирусот - оригиналниот вирус од 2020 година и варијантата омикрон.
Бивалентната вакцина на Moderna е одобрена за бустер дози за возрасни, откако беше откриено дека ги исполнува стандардите на британскиот регулатор за безбедност, квалитет и ефикасност, се нагласува во соопштението објавено на веб-страницата на британската Влада.
Одлуката за одобрување на бустер вакцината во Обединетото Кралство на Велика Британија и Северна Ирска ја поддржа владиното независно стручно научно советодавно тело - Комисијата за хумани лекови, по внимателна ревизија на доказите.
„Во секоја доза на Spikevax двовалентна Оригинална/Омикрон-засилувачка вакцина, половина од вакцината (25 микрограми) го таргетира оригиналниот вирус од 2020 година, а другата половина (25 микрограми) го таргетира омикронот“, се вели во соопштението на МХРА.
