Легендата на хрватската кошарка конечно се здоби со признанието после седум неуспешни обиди.
Откако во 2014 година беше номиниран од својот поранешен клуб Чикаго Булс, Тони Кукоч дури сега, во 2021 година, успеа да влезе во Куќата на славните на НБА.
Хрватот во минатото постојано се чудеше вечејќи дека не разбира зошто константно е оставан на страна при секое бирање на нови личности за влез во ова елитно друштво. Поранешни тренери, негови соиграчи, како и кошаркарски експерти постојано велеа дека НБА прави голема грешка изоставувајќи го бидејќи Кукоч е помеѓу најдобрите пет европски кошаркари на сите времиња.
Сепак, конечно сега ги дочека своите пет минути, а со неговото влегување во Куќата на славните Хрватска стана земја со најмногу претставници после САД. Пред Кукоч во елитното друштво влегоа Крешимир Чосиќ (1996), Дражен Петровиќ (2002), Мирко Новосел (2007) и Дино Раџа (2018).
Кукоч во својата богата кариера ја предводеше Југославија до две титули европски шампион (1989 и 1991) и една мундијалска (1990), а потоа со Хрватска стигна до сребро на ЛОИ 1992.
На клупски план тој беше дел од ѕвездениот состав на Чикаго Булс освојувајќи три последователни НБА титули (1996, 1997 и 1998), а исто толку титули освои и со Југопластика како шампион на Европа (1989, 1990 и 1991).
