Руската компанија Intellect Machine на воен саем во Москва претстави робот куче М-81, опремено со минофрлач.
Роботот е дизајниран да врши воени и цивилни задачи, може да се користи за различни намени во опасните зони, како и да помага во спасувачки мисии, извидница, да доставува лекови на заробени жртви и слично.
Но, М-81 има и воена примена, може прецизно да гаѓа, да идентификува цели, да патролира и да транспортира оружје и муниција. Во текот на демонстрација на саемот, М-81 изврши низа команди, а повремено и нишанеше со празниот минофрлач прикачен на грбот.
Од Intellect Machine објаснуваат дека М-81 е инспириран од светот на животните и од принципите на роботиката, особено кога станува збор за структури и механика, роботот е направен примарно со употреба на кинески компоненти и технологија, а чини 16.000 долари.
Продукциската верзија наскоро ќе биде достапна во Русија. М-81 е сличен на роботското куче Spot на компанијата Boston Dynamics, но и на кинескиот робот Go1. Сите роботи личат на куче и можат да вршат слични задачи.
