Бејсбол клубот Тексас Ренџерс новата МЛБ сезона ја отвори пред полни трибини и тоа целосно распродавајќи го стадионот.
Целокупниот капацитет на „Глоуб Лајф Филд“ стадионот во Арлингтон, односно 38.238 беа присутни на првиот домашен натпревар од новата сезона во МЛБ. Домашниот тим на Тексас Ренџерс сепак ги разочара навивачите губејќи со 2:6 од Торонто Блу Џејс. Претходно, Тексас одигра три натпревари против Канзас Сити Ројас и запиша два пораза и победа, но сите беа на гости.
Одлуката на Ренџерс да одржат натпревар пред полни трибини наиде на огромна критика од страна на здравствените лица, како и на самиот претседател Џо Бајден. Тој ваквата клупска одлука ја нарече „неодговорна“.
Клубот одлучи дека носењето маски и социјална дистанца останува задолжително во внатрешните места на стадионот, но на самите трибини ретко се гледаа навивачи кои носат маска.
Тексас Ренџерс објави дека се одлучиле на вакво нешто откако гувернерот Грег Абот ги тргна рестрикциите во сојузната држава Тексас кои се однесуваа на бројот на луѓе чие присуство е дозволено на настани.
„Цела година чекавме за да се отвориме и да играме пред навивачите. Многу се возбудивме кога гувернерот ја донесе одлуката уште на 2 март. Кога дознавме дека имаме таква шанса, се надевавме дека што повеќе навивачи ќе можеме да примиме сезонава“, вели Роб Метвик, извршен потпретседател на клубот.
Ренџерс најавија дека и за останатите натпревари од сезоната ќе продаваат колку што можат повеќе билети.
И на останатите натпревари има присуство на публика, но секаде во ограничен број. Само Тексас Ренџерс направи ваков голем исклучок и очигледно ќе продолжи да го прави.