Американската војска не само што инвестира во нуклеарно оружје и беспилотни летала, туку сè повеќе инвестира и во невронаука.
Нивната желба е, во иднина, да создадат систем што ќе овозможи скоро телепатска комуникација меѓу војниците.
За развој на ваков систем, кој би ги снимал сигналите на мозокот, би ги преведувал и на тој начин би овозможил читање на мислите на војниците, Армијата издвои 6,25 милиони долари за период од пет години.
Досега, воените научници беа во можност да идентификуваат кои сигнали во мозокот се одговорни за однесувањето на човекот. Иако ова можеби не значи многу, првиот чекор е да се идентификуваат различните сигнали, односно да се идентификуваат и толкуваат самите сигнали кои се однесуваат на свесни мисли.
„Можете да прочитате што сакате, но тоа не значи дека и ќе го разберете. Тоа е следниот чекор. На крајот на краиштата, тоа е нашата намера - да имаме компјутер што може целосно да комуницира со мозокот“, изјави научникот на чело на оваа програма, Хамид Крим за C4ISRNET.
Тој објасни дека сакаат да развијат систем што ќе ги препознава знаците на стрес или замор, пред самиот војник да биде свесен за нив. Ова може да спречи замор или непромислени потези кои произлегуваат од стрес.