Калифорнија прогласи вонредна состојба поради голема суша откако оваа година беше регистрирана како најсушна во изминатите сто.
Гувернерот Гевин Њусом прогласи вонредна состојба поради суша низ целата сојузна држава, откако претходно ја прогласи за осум окрузи.
„Бидејќи западниот дел на САД се соочува со потенцијална трета сушна година, клучно е граѓаните на Калифорнија да ги удвојат нашите напори да заштедиме вода на сите можни начини“, рече гувернерот во изјавата.
Претходно прогласената вонредна состојба сега е проширена на окрузите Империјал, Лос Анџелес, Оринџ, Риверсајд, Сан Бернардино, Сан Диего, Сан Франциско и Вентура, се вели во соопштението на Канцеларијата на гувернерот.
Канцеларијата на гувернерот: Оваа суша е најголема од 1800-тите
Прогласување вонредна состојба поради суша во целата држава ќе му овозможи на гувернерот да помогне во финансирањето на реакциите на суша и снабдувањето со вода.
Калифорнија имаше исклучително тешка година, беше погодена од високи температури, а количината на врнежи беше многу мала. Овие фактори, во комбинација со тековната криза за климатските промени, придонесуваат за разорната сезона на пожари, која не престанува со месеци.
Оваа суша е најголема од 1800-тите, земајќи го предвид недостатокот на врнежи и високите температури, додаде Кабинетот на гувернерот.
Езерата Пауел и Мид на рекордно најниско ниво
Годината сметана од 1 октомври 2020 година до 30 септември 2021, беше втората најсушна во Калифорнија. Полошо било само во 1924 година, според извештајот на државниот оддел за водни ресурси.
„Басенот на реката Колорадо, важен извор за снабдување со вода за Јужна Калифорнија, продолжи да се суши во 2021, а нивото на водата во езерата Мид и Пауел достигна нови рекордно најниски нивоа“, се вели во извештајот.
Езерата Пауел и Мид, најголемите резервоари за вода во таа држава, годинава се испразнија со алармантна стапка.
Овие две езера се клучни за хранење на сливот на реката Колорадо, бидејќи обезбедуваат вода за пиење и наводнување за многу делови од регионот, вклучително и рурални имоти, ранчови и домородни заедници.
Кон крајот на јули, езерото Пауел падна на приближно 33 проценти од капацитетот, се вели во извештајот на Канцеларијата за мелиорација. Последниот пат беше најнизок во 2005 година.
Огромната суша е најплодната почва за пожари, а повеќе од осум илјади интервенции за гаснење пожар се забележани во Калифорнија оваа година. Според податоците на пожарникарите во Калифорнија, досега се изгорени повеќе од два милиони хектари.
Во моментов пожарникарите се борат со дури осум големи пожари.
