Колку е важен секој момент за време на трките на патеката и возењето со голема брзина, прилично добро покажуваат податоците од новото истражување.
Трепкањето е природен и брз рефлекс кој човек не го ни забележува, но за возачите на Формула 1 кои возат со брзина поголема од 350 км/ч, едно трепкање значи губење на видот од речиси 20 метри. Со оглед на тоа дека човек трепка и до 30 пати во една минута, може да се процени дека возачот би губел околу 595 метри визуелни информации во минута само поради трепкање.
Сепак, се чини дека Ф1 возачите трепкаат на истите делови од патеките во текот на секој круг и на најмалку опасни делови за „губење на видот“, се вели во извештајот во магазинот Science News.
Ова откритие го потпишува научникот Риота Нишизоно, кој го спровел истражувањето заедно со своите колеги во Јапонија. Тој е поранешен професионален велосипедист кој има искуство во проценка на односот помеѓу брзината и трепкањето.
Забележал значителна празнина во литературата кога станува збор за трепкањето кај активните луѓе, и покрај тоа што во екстремни услови како што е тркањето, дури и мала грешка може да биде опасна по живот.
Во соработка со тркачки тим, Нишизоно кацигите на тројца возачи ги опремил со тракери за очи, по што извозеле вкупно 304 круга на три патеки.
Научниците откриле дека возачите не трепкале кога ја менувале брзината или насоката, туку тоа го правеле на релативно „побезбедни“ рамни делови од патеката.
Џонатан Матис, научник од Универзитетот Нортистерн во Бостон, кој го проучува човечкото движење и не бил вклучен во истражувањето, вели дека тоа дава некои клучни сознанија за човечкото однесување.
„Луѓето не го мислат трепкањето како нешто посебно, но тоа не е само 'бришење' на очите, тоа е дел од нашиот визуелен систем“, објаснува Матис.
