Одамна постои митот дека жените се полоши возачи од мажите. Фактите велат сосема поинаку.
За тоа знаат и во Франција, каде што штотуку започна кампањата „Вози како жена“. Иницирана е од здружението Victims & Citizens, а се базира на податоците дека 84% од сообраќајните несреќи со смртни последици се предизвикани од мажи.
Статистиката е ужасна. Мажите исто така претставуваат непропорционален удел на предизвикани сериозни повреди (75%) и инциденти со возење во пијана состојба (93%) меѓу младите возачи. Спротивно на тоа, жените прават многу помалку прекршоци во возењето и имаат осум пати помала веројатност да бидат вклучени во сообраќајни несреќи.
Некои ќе речат дека овие статистички податоци не укажуваат на вистинските факти бидејќи мажите сочинуваат поголем дел од популацијата на возачи. Сепак, податоците откриваат дека жените сочинуваат 42% од возачите во Франција, а постарите студии покажуваат дека нивната годишна километража (11.200 км) е доста блиску до онаа на мажите (12.500 км). Ова сугерира дека родовиот јаз во безбедноста на патиштата сепак не се должи на фреквенцијата на возење.
Здружението затоа вели дека треба да се угледаме на женските возачи. „Бројките се јасни: за да преживеат зад воланот, најдобро е мажите да се однесуваат исто како и жените. Така би се намалил бројот на несреќи, како и бројот на жртви“, стои во соопштението.
Кампањата има за цел да ја подигне свеста кај машките возачи со цел да се промени менталитетот, а со тоа и однесувањето. И ако се прашувате како возат жените, најкраткиот одговор би бил претпазливо, учтиво и со почитување на другите учесници во сообраќајот, со доза на аверзија кон ризичните маневри за возење.
