Од вечерва се враќаат на работа вработените во „Комунална хигиена“ во Скопје.
Извршниот одбор на синдикалната организација при ЈП „Комунална хигиена“ одржа состанок и донесе одлука револтот на вработените да продолжи да го манифестира и да искористи други законски права што ги имаат со цел граѓаните на Скопје да не трпат поради игнорантскиот однос на менаџментот на претпријатието во однос на решавање на проблемите на вработените во „Комунална“.
Како што рекоа претставниците на синдикатот, сите вработени денеска ќе почнат со своите работни активности со оглед дека претстојат денови на екстремна жештина и веќе работниците од втората смена ќе почнат со работа, со собирање на сметот.
„Во текот на денот синдикалната организација ќе одржи уште еден состанок за дефинирање на понатамошните чекори во однос на проблемите што ги имаат вработените во 'Комунална'“, посочија од синдикатот.
Не може да се среди за пет часа нешто што не се средило три дена поради заложништвото на мафијашки структури, порача градоначалничката Данела Арсовска по забелешките дека градот и натаму се задушува во ѓубре. Директорката на „Комунална хигиена“, Косана Мазнева, посочи дека нема да остане општина во која контејнерите ќе останат полни. Двете се согласни дека постапуваат и работат за да се сервисираат сите потреби на граѓаните.
„Нашето претпријатие три дена беше под целосна блокада. Територијата на град Скопје беше во заложништво. Од вчера, по 12-1 часот, екипите се на терен. Екипирани се сите работници. Нема да постои ниту една општина во која нема да се исчисти сметот. Ќе работиме 24 часа, сè почна со градските улици – само да ги сервисираме потребите на граѓаните“, рече Мазнева.
Арсовска одново го впери прстот во мафијашките структури, кои на прес-конференцијата не ги посочи со име и презиме, но ги пишала во кривичната до Обвинителството.
„За пет часа не можеме да го надополниме она што овие мафијаши го направија како штета за три дена. Се работи, ќе се исчисти“, рече Арсовска за полните контејнери.
Директорката Мазнева посочи дека таа не работи контра вработените, туку во нивна корист.
„Јавното претпријатие е во целосна кондиција. Во нивни настапи пред медиумите одредени личности клеветат и даваат лажни изјави. Во Јавното претпријатие 'Комунална хигиена' од 2007 година ниту еден вработен нема добиено регрес на плата. Сега е исплатен. Личните заштитни средства, ракавици и костими, иако е законска обврска да се дадат од претпријатието, тие не биле дадени. Ќе ви дадам документи дека оваа година се поделени личните заштитни средства“, додаде Мазнева.
