Претседателот на Србија, Александар Вучиќ изјави дека ситуацијата во Србија, а особено во Белград е алармантна, па затоа од овој викенд повторно ќе воведе полициски час.
„Денеска е најтешкиот ден од почетокот на епидемијата, имаме 13 починати и повеќе од 120 луѓе се на респиратори. Ситуацијата во Белград е алармантна. Сериозна е ситуацијата во уште 4 градови во Србија, но во Белград е најкритично“, изјави Вучиќ.
Полицискиот час за жителите на Белград ќе започне во петок во 18 часот и ќе трае до понеделник до 5 часот наутро.
Тој изјави дека би сакал полицискиот час да важи за цела Србија, но за тоа ќе одлучат на состанокот на Кризниот штаб.
Вучиќ упати апел до сите граѓани да ги почитуваат мерките, да го чуваат здравствениот систем, а особено постарите и луѓето со прекумерна тежина.
Тој додаде дека во Србија дневно се тестираат околу 9.000 луѓе, а во овој момент имаат 376 слободни респиратори.