Поголем дел од граѓаните – 62% го поддржува процесот на зачленување на Северна Македонија во Европската Унија (ЕУ), покажува заедничкото истражување на Институтот за демократија и локалната канцеларија на Фондацијата „Конрад Аденауер“.
Резултатите од анализите потврдуваат дека сѐ уште има голема разлика во поддршката кон ЕУ меѓу двете најголеми етнички групи – 56% од испитаниците Македонци се ЗА во Унијата, додека тој процент кај Албанците е многу поголем – дури 82, пренесе Гласот на Америка.
43% од граѓаните мислат дека опструкциите од соседните земји се најголемата пречка за напредокот на земјата. 20% од испитаниците се ЗА уставни измени, додека другите се поделени за статус-кво, повлекување од процесот и промена на преговарачката рамка.
Иако поддршката за влез во ЕУ од 62% сѐ уште е висока, кога ќе се спореди со ситуацијата од пред 10 години, се забележува надолен тренд. Во 2014 година дури 80% биле ЗА земјата да стане дел од Унијата.
