Нашиот Горан Пандев и големиот Џиџи Буфон синоќа се растурија од смеење, а видеото од нив двајца стана вирално.
Синоќа на „Алианц“ стадионот во Торино Јувентус го пречека тимот на Горан Пандев и го победи со 3:1. Пандев играше до 63. минута, додека Буфон беше на клупата за резерви, но најдоа момент да се начекаат на муабет.
Така, наместо головите од победата над „Грифоните“, фудбалските фанови ширум интернетот ја споделуваат снимката на која се гледа како Горан Пандев и Џанлуиџи Буфон имаат еден навистина пријатен разговор од кој и двајцата пуката од смеење.
Капак на сѐ е коментарот на англискиот коментатор од ESPN.
„Се прашувам за што зборуваат? 'Кога ќе се пензионираш? Не, кога ти ќе се пензионираш?'“, коментираше тој.
Во еден момент Буфон прави гестикулација со рацете која означува крај на нешто, па веројатно токму и за пензионирањето зборувале.
Нормално, на социјалните мрежи се јавија разно-разни теории. Една вели дека се шегувале за бламажата која Пандев и другарите од репрезентацијата ѝ ја приредија на Германија, а други, пак, велат дека се шегувале за оној легендарен гол на Пандев од 2005 кога ја издрибла целата одбрана на Јуве и му даде гол токму на Буфон.
Во секој случај, убаво си се насмеаја, а богами и сите ние заедно со нив.