Францускиот парламент денеска усвои закон за задолжителна вакцинација против COVID -19 за здравствените работници и за воведување на здравствена карта за широк спектар на социјални активности, додека Франција се бори со четвртиот бран на ширење на коронавирусот.
На посетителите кои одат во музеи, кина или базени во Франција веќе им е забранет влез освен ако немаат пропусница што укажува на тоа дека биле вакцинирани против КОВИД или неодамна направиле негативен тест. Пропусницата важи и за влез на големи фестивали и во клубови.
Од почетокот на август, ќе биде потребна пропусница за влез во ресторани и барови и за патување на подалечни дестинации со воз и авион.
Мерките содржани во законот треба да траат до 15 ноември, а последното зелено светло на Уставниот суд ќе биде потребно пред законот да стапи на сила.
Уште недоволно вакцинирани
Франција, како и многу други земји ширум Европа, се соочува со многу заразната делта варијанта, најпрво идентификувана во Индија, која се заканува да ја продолжи пандемијата.
На почетокот на јули, Франција бележеше околу 4.000 нови случаи на инфекција со коронавирус на ден, а минатата недела тој број достигна 22.000. Расте и бројот на хоспитализирани.
Властите ги зголемуваат напорите за олеснување на масовните вакцинации. До недела, 49,3 проценти од вкупно 67 милиони француско население примиле две дози - или една доза на вакцина - што сè уште е далеку од прагот за кој експертите велат дека во голема мера може да го запре пренесувањето на болеста или имунитетот на стадо.
