Двократниот светски шампион во сноубординг Алекс Пулен најверојатно се удавил додека ловел риба со копје во родната Австралија.
Пулен (32) ловел риба под вода во близина на плажата Голд Коус во Квинсленд.
Нуркач го нашол онесвестен под вода на еден вештачки гребен, а локалните спасувачи го извлекле на плажата и се обиделе да му помогнат. Болничарите од екипата на Брзата помош се обиделе да го реанимираат, но безуспешно.
Сноубордерот познат по прекарот Чампи беше носител на знамето на Австралија на Зимските Олимписки игри во Сочи во 2014 година.
Полицијата соопшти дека Пулен најверојатно нуркал сам и не носел маска за кислород.
Чампи претходно на социјалните мрежи објавуваше фотографии од неговите омилени активности: пливање, сурфање и ловење риба со копје под вода.
Спортската бординг заедница се збогува со Пулен преку социјалните мрежи, каде сочувство изразуваат и низа други спортисти и обожаватели на шампионот кои го опишуваат како добар и великодушен човек.
Пулен ја освои шампионската титула во 2011 и во 2013 година и ја претставувал Австралија во сноубординг крос на ЗОИ во 2010, 2014 и 2018 година.
