На норвешкиот архипелаг на Арктикот, Свалбард, вчера беше урнат апсолутниот рекорд со измерената температура од 21,7 степени Целзиусови, соопшти Норвешкиот метеоролошки институт.
Со 21,7 степени измерени во 18 часот по локално време во близина на местото Лонџербјен, архипелагот го имаше најтоплиот ден во историјата, поточно откако почна мерењата на температурата во областа.
Групата острови, познати како Спицберг, се наоѓаат на 1.000 километри од Северниот Пол.
Во јули, најтоплиот месец на Арктикот, температурите во Свалбард се движат меѓу 5 и 8 степени.
Научниците велат дека Арктикот се затоплува двапати побрзо од остатокот на планетата.
Свалбард е познат по поларните мечки, но во тој архипелаг има и рудник за јаглен, а станува збор за енергија што испушта најмногу гасови со ефект на стаклена градина.
Во Свалбард, исто така се наоѓа и „Ноевата арка“ со семиња за иднината во случај на катаклизма, основана во 2008 година.
