Вкупно 82 приговора се поднесени до 21 часот синоќа, информираат од Државната изборна комисија (ДИК).
Најголем број од приговорите, 74, се од Алијанса за Албанците, 1 е од Глас за Македонија, додека 2 се од ВМРО-ДПМНЕ. ДИК не прецизира на што се однесуваат приговорите од Алијанса за Албанците, но оние од ВМРО-ДПМНЕ вели дека се за сумирање на резултатите.
Претходно, во текот на денот, до ДИК пристигнаа 5 приговори и едно барање за увид во неважечките ливчиња од гласањето.
До 21 часот синоќа можеа да се поднесуваат приговори за постапката на гласање, додека за сумирањето и утврдувањето на резултатите приговори може да се доставуваат до денеска до 19 часот и 30 минути.
Роковите за приговори почнаа да течат завчера, кога беа објавени неофицијалните конечни резултати.
По завршување на роковите за поднесување приговори, ДИК ќе закаже седница на која јавно ќе ги разгледа и ќе одлучува.
