Азербејџанското Министерство за одбрана соопшти дека нивните вооружени сили зазеле голем број села и стратешки ридови во регионите Фузули и Џабраил, во непосредна близина на Нагорно-Карабах, додека ерменското Министерство вели дека уништиле противнички хеликоптери, беспилотни летала и тенкови.
– Како резултат на контранападот на нашите армиски единици ослободени се голем број села и важни ридови што беа под окупација, рече Анар Ејвазов, шеф на прес-службата на Министерството за одбрана на Азербејџан.
– Борбените операции продолжуваат, додаде Ејвазов.
Прес-секретарот на ерменското Министерство за одбрана, Шушан Степанијан, возврати дека изјавите на азербејџанското Министерство за одбрана во врска со контролата врз шесте населени места во Нагорно-Карабах не одговараат на реалноста.
– Ова е уште една провокација на азербејџанската пропаганда, рече таа.
– За време на ескалацијата на контактната линија во Карабах, азербејџанската страна изгуби 4 хеликоптери, 15 беспилотни летала, 10 тенкови и борбени возила на пешадија, рече Степанијан.
Претходно, Баку ги демантираше информациите на ерменската страна за 3 уништени тенкови, 2 хеликоптера и 3 беспилотни летала на азербејџанските вооружени сили.
– Единиците на Армијата на одбраната на Карабах се борат во северните, јужните и југоисточните насоки на линијата на контакт, спречувајќи го напредувањето на непријателот. Непријателот претрпе големи загуби во човечка сила и опрема, напиша Степанијан на Facebook.
Германскиот министер за надворешни работи, Хајко Мас, во меѓувреме, се придружи на повиците од Турција, Русија, Франција и ЕУ кон двете завојувани земји за деескалација на судирите и враќање кон преговори.