Целосно женски судиски тим ќе го суди натпреварот на Светското првенство в четврток меѓу Костарика и Германија во Катар.
Главна судијка ќе биде Стефани Фрапар, а таа ќе стане и првата жена што ќе ја има таа улога на Светско првенство за мажи.
Французинката претходно стана прва судијка на машкото светско првенство бидејќи ја имаше улогата на четврти судија на мечот Мексико - Полска.
„Јасно ни е дека постои притисок. Сепак, тоа нема да нè промени. Ќе бидеме мирни, концентрирани и нема да размислуваме премногу за медиумите и останатите, само ќе се фокусираме на теренот“, изјави Фрапар за BBC Sport.
Ќе ѝ помагаат колешките Неуза Бак и Карен Дијаз Медина кога в четврток на стадионот „Ал Бајт“ ќе започне натпреварот меѓу Костарика и Германија.
„Откако почнав да судам, секогаш имав поддршка од тимовите, клубовите и играчите. Секогаш бев добредојдена на стадионот, се чувствував како другите судии на теренот“, изјави Фрапар.
Таа беше првата жена која судеше на машки натпревар од Лигата на шампионите во 2020 година.
38-годишната Французинка беше првата жена која судеше на голем фудбалски натпревар за мажи кога Ливерпул и Челси се сретнаа во Суперкупот на УЕФА во 2019 година.
Улогата на главни судијки на овој Мундијал ќе ја имаат и Салима Мукансанг од Руанда и Јошими Јамашита од Јапонија.