Мумифицираните останки на 22 древни египетски кралеви и кралици вчера беа преместени кон нивното ново почивалиште со величествена парада низ улиците на Каиро.
Историската поворка на кралски мумии тргна од плоштадот Тахрир во Каиро кон новото почивалиште вчера во 18 часот по локално време, а голем број Египќани го следеа спектаклот што чинеше милиони долари.
Сè се емитуваше и на државната телевизија. Во првата кочија се останките на Секененре Тао Втори (во некои транскрипции Такененре Таа), познат како Храбриот, кој владеел со јужен Египет околу 1600 година п.н.е., додека во последната е мумијата на Рамзес IX., кој владеел во 12 век п.н.е.
Мумиите на Рамзес II и кралицата Хатшепсут се исто така во поворката.
Египет се соочи со голем пораст на бројот на лица заразени со коронавирус пред една година, но по падот на бројот на нови инфекции и смртни случаи, укинати се ограничувањата за собири на отворено и граѓаните можеа да ја следат парадата во живо.
Поворката од црни кочии со позлатени орнаменти, што потсетуваше на древна погребна поворка, течеше под строги безбедносни мерки. Останките на 18 кралеви и четири кралици, сортирани според возраста, се носеа на одделни платформи украсени во древноегипетски стил во поворката наречена „Златна парада на фараоните“.
Останките беа префрлени од Египетскиот музеј во центарот на Каиро, каде што престојуваа со децении, во Националниот музеј на египетската цивилизација, отворен во 2017 година во јужниот дел на градот.
Тие ќе бидат сместени таму во „малку помодерни витрини“, рече Салима Икрам, професор по египетологија на Американскиот универзитет во Каиро.
„Контролата на температурата и влажноста ќе биде подобра отколку во стариот музеј“, додаде Икрам, експерт за мумификација.
Мумиите ќе бидат сместени во Кралската сала на мумиите и ќе бидат достапни за посетители од 18 април. Салата е дизајнирана така што посетителите ќе имаат чувство дека се наоѓаат во Долината на кралевите во Луксор.
Во нивниот нов дом, тие ќе бидат изложени одделно, секој до својот саркофаг, а во некои случаи до нив ќе има и статуа. Експонатите ќе имаат кратки ознаки со биографија на владетелот, а во некои случаи и копии на снимки со магнетна резонанца.
Откриени недалеку од Луксор, почетокот на 1881 година, повеќето од овие 22 мумии биле изложени уште од почетокот на 20 век во Египетскиот музеј на плоштадот Тахрир. Од 50-тите, тие беа изложени во мала просторија, една до друга, без ознаки со објаснувања.
Пред селидбата, мумиите биле ставени во специјални контејнери со азот, во услови слични на оние во нивните изложбени витрини.
Националниот музеј на египетска цивилизација беше завршен во 2010 година и планирано беше да биде отворен во 2012 година, рече египетологот Захи Хавас. Овој план пропадна поради револуцијата во 2011 година и нестабилноста што следеше по неа.
Во следниве месеци се очекува Египет да отвори уште еден музеј, Големиот египетски музеј, во близина на пирамидите во Гиза. Во него ќе бидат сместени и фараонски колекции, вклучително и мумифицираните останки на Тутанкамон.
