Садио Мане синоќа со раце го блокираше опасниот удар на Николо Барела, а иако инцидентот беше внатре во шестнаесетникот и судијата долго гледаше на ВАР, на крајот пенал не беше досуден.
И по преспиено утро сите си го поставуваaт истото прашање: Како е можно за очигледното играње со раце на Мане да не биде досуден пенал во корист на Интер?
Инцидентот се случи во 8. минута кога по нафрлување од корнер во казнениот простор нa Баерн домашните играчи ја исфрлија топката, но Барела надвор од шестнаесетникот ја начека на волеј и упати силен удар кој одеше во рамките на голот. На патот кон голот се најде Садио Мане кој инстинктивно ги крена рацете бидејќи топката му одеше в глава и како голман го одбрани ударот на Барела.
Играњето со рака го видоа сите, но словачкиот судија Иван Кружлиак веднаш одмавна со рацете. Потоа беше повикан од страна на своите колеги во ВАР собата да погледне реприза од инцидентот. Иако речиси цела минута ја разгледуваше ситуацијата, на крајот одлучи дека пенал нема, по што беше опколен од играчите во жолти дресови.
Според правилата на ФИФА, играњето со рака на Мане не влијае на патеката на топката бидејќи не ги крена рацете повисоко од главата, туку ги намести токму пред неа за топката да не го погоди в лице. Според тоа, играњето со рака е ирелевантно бидејќи топката секако ќе беше одбиена од него.
Контроверзна одлука, но технички сепак исправна, согласно денешните правила на ФИФА. Ваков инцидент пред неколку години, пред имплементирањето на новите правила, со сигурност ќе беше пенал.
Резултатот во тој момент беше 0:0, а потоа Баерн постигна два гола преку Французинот Бенжаман Павар во 32. минута и Камерунецот Ерик Максим Шупо-Мотинг во 72. минута за победа од 2:0 која сепак не влијаеше врз конечниот пласман кој во оваа група беше веќе одреден по 5-тото коло.